الماتى قالاسىندا «الاتاۋ» كينوكونسەرت زالىندا «ەلباسى جولى. استانا» كوركەم ءفيلمىنىڭ تۇساۋكەسەرى ءوتتى. ءفيلمدى ق ر مادەنيەت جانە سپورت مينيسترلىگى تاپسىرىسى بويىنشا «ساتايفيلم» كينوكومپانياسىنىڭ قاتىسۋىمەن ش.ايمانوۆ اتىنداعى «قازاقفيلم» كينوستۋدياسى ءتۇسىردى. كوركەم كينوتۋىندىنىڭ رەجيسسەرى – اقان ساتايەۆ.

«قازاقفيلم» كينوستۋدياسىنىڭ ەڭ ءىرى جوبالارىنىڭ ءبىرى بولىپ سانالاتىن ءفيلمنىڭ سالتاناتتى كورسەتىلىمى شىعارماشىلىق توپتىڭ قاتىسۋىمەن ءوتتى. 

– وسىنداي ءىرى جوبادا جۇمىس ىستەۋ مەن ءۇشىن جانە مەنىڭ كوماندام ءۇشىن ۇلكەن قۇرمەت. ءبىزدىڭ فيلم بارلىق كورەرمەندەرگە ارنالعان، ويتكەنى بۇل فيلمدە بارىمىزگە ورتاق – ەلىمىزدىڭ تاريحى باياندالادى. ۇلكەن اعا-اپكەلەرىمىزدەن باستاپ، ءىنى-قارىنداستارىمىزعا دەيىن بۇل تۋىندى قىزىقتى بولاتىنىنا سەنىمدىمىن. ءفيلمدى قىزىقتى ءارى شىنايى ەتىپ جاساۋعا تىرىستىق. كارتينا تاريحي فاكتىلەرگە نەگىزدەلگەن، سوندىقتان دا فيلمدەگى بارلىق كەيىپكەرلەر دە شىنايى ومىردەگى ادامدار، بولعان وقيعالاردىڭ كۋاگەرلەرى ، – دەدى رەجيسسەر اقان ساتايەۆ.

ايتا كەتسەك، «ەلباسى جولى. استانا» – «ەلباسى جولى» كينوەپوپەياسىنىڭ التىنشى ءبولىمى. ونىڭ الدىندا تۇسىرىلگەن «بالالىق شاعىمنىڭ اسپانى»،  «وت–وزەن»، «تەمىرتاۋ»، «تىعىرىقتان جول تاپقان»، «جۇلدىزدار توعىسقاندا» فيلمدەرى كورەرمەننىڭ ىستىق ءىقىلاس-ىلتيپاتىنا بولەنگەنى تۋرالى ايتا كەتكەن ءجون.   

«ەلباسى جولى. استانا» فيلمىنە ەلوردامىز – استانانىڭ سالىنۋ تاريحى ارقاۋ بولعان. وقيعا 1994 جىلدىڭ شىلدە ايىنان باستاۋ الادى. كەڭەس وداعى قۇلاعاننان كەيىن قازاقستاننىڭ تاۋەلسىز دارا جولى باستالادى. ەكونوميكالىق داعدارىس پەن ساياسي تۇراقسىزدىققا تاپ بولعان سول ءبىر قيىن-قىستاۋ كەزەڭدەردە، مەملەكەت باسشىسى استانانى الماتىدان اقمولاعا كوشىرۋدى ۇسىنادى. بۇل ۇسىنىس بارشا حالىق ءۇشىن كۇتپەگەن وقيعا بولدى، مۇنداي شەشىمنىڭ ىسكە اساتىنىنا جانە ونىڭ جەمىستى بولاتىنىنا ەشكىم سەنبەدى. ءبىراق قاۋىپ-قاتەر مەن قاراما-قايشىلىقتارعا قاراماستان، كوپشىلىكتىڭ كۇدىكتەرىنە، كۇمانشىلدەردىڭ سىنى مەن قارجىلىق قيىندىقتارعا توتەپ بەرە وتىرىپ، پرەزيدەنتتىڭ باسشىلىعىمەن ەلىمىز مەجەلەنگەن ماقساتتى ىسكە اسىردى. 1998 جىلدىڭ 10 ماۋسىمىندا جاڭا استانا – استانا قالاسىنىڭ حالىقارالىق تۇساۋكەسەرى وتكىزىلدى.

ءفيلمنىڭ سەناريىن ادىلبەك جاقسىبەكوۆ جانە تيمۋر جاقسىلىقوۆ بىرلەسىپ جازعان. كوركەم تۋىندىنىڭ ءتۇسىرۋ جۇمىستارى بىلتىر جەلتوقسان ايىندا قولعا الىندى. كارتينانىڭ نەگىزگى تۇسىرىلىمدەرى استانادا جۇرگىزىلدى. مىسالى، نەگىزگى تۇسىرىلىمدەر ەلوردامىزدى الماتىدان استاناعا اۋىستىرعاننان كەيىنگى پرەزيدەنت ن.ءا. نازاربايەۆ 1997–2004 جىلدارى ارالىعىندا جەتى جىل بويى جۇمىس ىستەگەن العاشقى رەزيدەنسياسى – ەلباسى كىتاپحاناسىنىڭ مۋزەيى عيماراتىندا جۇرگىزىلدى.  مۇندا جوعارى دەڭگەيدەگى كەزدەسۋلەر مەن كەلىسسوزدەر وتكىزىلىپ، ەلىمىزدىڭ تاعدىرىنا قاتىستى شەشىمدەر قابىلداندى. العاشقى كەيپىندە ساقتالعان مەملەكەت باسشىسىنىڭ كابينەتى، قابىلداۋ جانە وتىرىس زالدارى سول جىلدارداعى جۇمىس كۇندەردىڭ اتموسفەراسىن بىردەن بەرە الدى.  

فيلمگە تۇسكەن اكتەرلەر تۋرالى دا ايتا كەتكەن ءجون. ن.ءا. نازاربايەۆتىڭ ءرولىن تەاتر جانە كينو اكتەرى مۇرات احمانوۆ سومدادى. سونداي-اق فيلمگە ەركەبۇلان دايىروۆ، جان بايجانبايەۆ جانە باسقا دا تانىمال كينو جۇلدىزدارى ءتۇستى. ايتا كەتسەك، وسى جوباعا بريتاندىق گريم بويىنشا سۋرەتشى، «وسكار» جۇلدەسىنىڭ يەگەرى مارك كولەر ارنايى شاقىرىلدى. ول مارگارەت تەچەر جانە ۋينستون چەرچيلدىڭ وبرازدارىن جاساعان.

ءفيلمنىڭ تۇسىرىلىمدەرىنە پرەزيدەنتتىڭ كەڭسە قىزمەتكەرلەرى، پروتوكول قىزمەتى مەن مەملەكەت باسشىسى كۇزەت قىزمەتكەرلەرى كەڭەسشى بولىپ ارنايى تارتىلدى.